Во судницата во „Идризово“ при Основниот кривичен суд Скопје денеска треба да продолжи судењето за пожарот во дискотеката „Пулс“ во Кочани, во кој загинаа 63 лица, а над 200 беа повредени. Случајот се наоѓа во доказна постапка и треба да продолжи со изведување на докази од одбраната.
На минатото рочиште заврши изведувањето на доказите на Јавното обвинителство, при што беа изведени 1.390 материјални докази и сослушани 45 сведоци и пет вешти лица, додека одбраната има најавено 244 сведоци. Бидејќи на 3 октомври законски истекува притворот на првообвинетиот Дејан Јованов-Деко, за што одбраната понуди имотна гаранција од речиси 200 илјади евра, од Кривичниот суд информираа:
– До денеска не се вратени од ОЈО. Нема мислење и ние не можеме да одлучиме. На 3 октомври истекува. Ќе почекаме до петок.
Предметите ги води судијката Дијана Груевска-Илиевска, а обвинението го застапува тим од 15 јавни обвинители.