Со сослушување сведоци предложени од Јавното обвинителство, денеска во судницата во „Идризово“ продолжува судењето за пожарот во дискотеката „Пулс“ во Кочани, во кој загинаа 63 лица, а над 200 беа повредени.
На претходното рочиште беа сослушани двајца сведоци. Маја Тимовска од Дирекцијата за заштита и спасување појасни дека сите субјекти во системот за заштита и спасување имаат обврска да изготват и достават четири клучни документи, меѓу кои план и процена за ризици. Таа потврди дека и управителите на „Пулс“ имале таква обврска.
Сведочеше и Верица Милевска-Стефановска, претседателка на Комората за приватно обезбедување, која говореше за процедурите за лиценцирање, обврските при обезбедување објекти и контролата на влез, при што нагласи дека употребата на пиротехника претставува сериозен безбедносен ризик.
Пожарот во дискотеката „Пулс“ во Кочани избувна на 16 март 2025 година за време на настап, при што се случи една од најтешките трагедии во поновата историја на земјата. Со денешното рочиште продолжува доказната постапка со сведоци предложени од Обвинителството, кое го застапува тим од 15 јавни обвинители.