Судењето за трагичниот пожар во дискотеката „Пулс“ во Кочани, во кој загинаа 63 лица, продолжи денеска со воведни зборови на одбраната на обвинетите од Министерството за економија (МЕ). Обвинетите државни службеници тврдат дека нивната улога се сведувала само на службена, административна проверка на документацијата за лиценци, без никаква надлежност да предизвикаат или придонесат кон пожарот од 16 март 2025 година.
Адвокатите нагласија дека обвинетите „ниту им било обврска, ниту надлежност по закон да вршат проверка на било какви услови“ и немале можност да ја проверуваат точноста на документите, бидејќи работеле со документација заверена и потпишана од други институции.
Адвокатот Петре Шилегов, бранител на поранешниот државен советник Шефкет Хазари, го оцени обвинението како „правно неосновано, нелогично конструирано“ и изјави дека тоа „не заслужува да носи име обвинителен акт“.
„Долго размислував дали да одиме со читање на кривичните дела… за жал тоа ќе морам да го сторам, бидејќи правно по аналфабетски памфлет немам видено“, рече Шилегов.
Шилегов ја оцени како апсурдна тезата дека Хазари, кој работел во МЕ од 2005 до 2020 година, во периодот од 2013 до 2019 година се согласил дека во 2025 година ќе настане пожар во Кочани.
Хазари само ја проверувал согласноста за издавање на лиценците во периодот од 2013 до 2018 година.
Шилегов нагласи дека кривичното дело „Предизвикува општа опасност“ е непосредно и моментално дело, а обвинението е апсурдно поради примена на т.н. теорија на каузалитет и тврдењето дека 34 обвинети се договориле свесно да ја запалат дискотеката.
Адвокатот Еленко Миланов, бранител на Зоран Николовски, посочи на нерамноправност пред законот.
Николовски е обвинет за лиценци издадени во 2012 и 2013 година, иако во вториот случај постапил по право и лиценцата престанала да важи по една година. Миланов нагласи дека Лилјана Илиевска, која ја контролирала истата лиценца од 2013 година како Николовски, добила наредба за запирање на истрагата поради немање елементи на дело, додека Николовски добил обвинителен акт.
„За исто постапување, во ист временски период. Едно лице добива наредба за запирање на постапката… и Зоран Николовски добива обвинителен акт. Колку што ми е познато, тоа е факт, дека сите граѓани се еднакви пред законот. И каква е таа еднаквост, со вакви две дијаметрално спротивни одлуки“, изјави Миланов.
Одбраната на Беким Хаџиу и Арлинда Касапи, исто така вработени во МЕ, изјави дека товарот на трагедијата не смее неправедно да падне врз административни службеници чии надлежности не биле да проверуваат хидранти, инсталации и излези, туку само да постапуваат со заверена документација.
Обвинителството, застапувано од тим од 15 јавни обвинители, најави дека доказите ќе покажат оти клубот „Пулс“ бил смртоносна стапица уште од самиот почеток, како резултат на системска негрижа и институционални пропусти.