Пари префрлани преку банкарска сметка по претходни договори на Вибер овозможиле студентка по стоматологија без потребното знаење да се стекне со Уверение за положен стручен испит за здравствени работници.
Корупциската шема во високото образование и здравството била разоткриена кога истражителите влегоа во домовите на инволвираните, при што беше запленена огромна сума пари во различни валути – дури 65.280 евра, 29.840 франци и 161.500 денари.
Однесувањето на студентката А.Т. од Битола била почетната точка, која со цел да дојде до лиценца, му дала парична награда на С.Ч., професор на Стоматолошкиот факултет и поранешен потпретседател на Стоматолошката комора.
Целта на ова плаќање била тој да изврши директно влијание кај С.Е., претседателот на Комисијата за полагање стручен испит при Министерството за здравство, кој потоа ѝ овозможил на кандидатката да ја помине декемвриската испитна сесија без соодветни квалификации.
За овој факултетски и здравствен скандал, Единицата за финансиски криминал поднесе кривични пријави за „давање награда за противзаконито влијание“, „примање награда за противзаконито влијание“ и „примање поткуп“ против 27-годишната студентка, 56-годишниот професор и 63-годишниот претседател на комисијата.
- „На 27.07.2026, Единицата за финансиски криминал при Секторот за криминалистички истраги во Одделот за сузбивање на организиран и сериозен криминал до ОЈО за ГОКК поднесе кривична пријава против три лица. А.Т.(27) од Битола заради постоење на основано сомнение за сторено кривично дело „давање награда за противзаконито влијание“ по член 358-а ст.2 в.в. ст.1, С.Ч.(56) од Гостивар за „примање награда за противзаконито влијание“ по член 359 ст.2 в.в. ст.1 и С.Е.(63) од Скопје за „примање поткуп“ по член 357 ст.1 од КЗ. Од страна на полициски службеници од Одделот за сузбивање на организиран и сериозен криминал извршени се претреси кај второ и третопријавениот при што се пронајдени и одземени парични средства во износ од 65.280 евра 29.840 франци и 161.500 денари. Пријавената А.Т. како студент на Стоматолошки факултет со намера да се стекне со Уверение за положен стручен испит на здравствени работници со високо образование од областа на стоматологијата, во декември 2025 година по повеќекратна комуникација преку на платформата Вибер, на пријавениот С.Ч., професор на Стоматолошки факултет и поранешен Потпретседател на Стоматолошка комора му дала награда во вид на парични средства кои му ги префрлила на неговата банкарска трансакциска сметка. Парични средства му биле дадени на С.Ч. со цел истиот да изврши влијание кај пријавениот С.Е. во својство на Претседател на Комисијата за полагање на стручен испит на здравствени работници со високо образование од областа на стоматологијата при Министерството за здравство, при што пријавената А.Т. во декемвриска испитна сесија полагала на 17.12.2025 пред формираната комисија и без да го поседува потребното знаење се стекнала со Уверение за положен стручен испит“, соопштија од полицијата.