Македонскиот народен театар денеска ќе настапи на јубилејното 60-то издание на Меѓународниот театарски фестивал „Војдан Чернодрински“ во Прилеп со претставата „Страв и надеж“, во режија на Татјана Мандиќ Ригонат.
Претставата е дел од официјалната селекција на фестивалот, кој важи за еден од најзначајните театрални настани во земјава и регионот, а годинава одбележува шест децении постоење.
„Страв и надеж“ е современа сценска приказна која ги истражува стравовите, осаменоста и неизвесноста на современиот човек. Дејството е поставено во актуелен контекст, обележан со војни, економска нестабилност и криза на хуманистичките вредности. Инспирирана од драмскиот свет на Франц Ксавер Крец, претставата тематски кореспондира со Орвеловата „1984“, отворајќи прашања за човековата ранливост и опстанок.
Претставата се состои од петнаесет сцени во кои ликовите се соочуваат со клучни животни моменти, при што хуморот и трагиката се испреплетуваат во динамична приказна.
Во актерската екипа настапуваат Сашко Коцев, Сашка Димитровска, Александар Микиќ, Дарја Ризова, Наталија Теодосиева, Никола Ристановски, Тони Михајловски, Тања Кочовска, Лола Кукла, Дамјан Цветановски и Нела Павловска, со музичка поддршка од Зоран Станишиќ, Стефан Котевски, Никола Соколовски и Милена Наумовска.
По изведбата на фестивалот, „Страв и надеж“ повторно ќе биде прикажана на сцената на Македонскиот народен театар на 17 јуни со почеток во 20 часот.