Најмалку десет лица го загубија животот во тешка сообраќајна несреќа откако туристички автобус се преврте во планински регион во близина на Рио де Жанеиро, Бразил, соопшти Федералната сообраќајна полиција.
Несреќата се случила во раните утрински часови, околу 4:30 часот по локално време, во моментот кога возилото се спуштало по планинскиот пат кон градот, пренесува локалниот портал „Гаучаж“.
Автобусот, кој е во сопственост на превозничката компанија „Estrela Guia Turismo“, сообраќал на релација од Бело Хоризонте кон познатото туристичко место Копакабана, сместено во јужната зона на Рио де Жанеиро.
Според официјалните информации од противпожарните екипи кои интервенирале на теренот, уште две лица се наоѓаат во тешка здравствена состојба, додека 12 патници се здобиле со полесни повреди.
Спасувачките служби и полицијата извршија увид на местото на несреќата, а надлежните органи ги утврдуваат причините кои довеле до превртување на возилото.