Тешка сообраќајна несреќа се случи денеска во градот Кампулунг во романскиот округ Аргеш, кога минибус во кој се превезувале играчите од резервниот тим на Динамо Букурешт излетал од патот и удрил во дрво.
До несреќата дошло откако 83-годишниот возач на возилото доживеал срцев удар за време на возењето.
Во моментот на сообраќајката во минибусот имало 16 лица. На лице место починал масерот на тимот, додека уште 10 лица се повредени.
Надлежните служби во Романија веднаш активирале црвен аларм со цел повредените побрзо да бидат транспортирани и медицински згрижени.
Сите повредени се пренесени во болница за дополнителни прегледи и утврдување на степенот на повредите. Играчите и членовите на стручниот штаб се здобиле со повреди, но се надвор од животна опасност, додека тренерот Адријан Ропотан се здобил со скршеници на двете раце.
Преку официјално соопштение се огласија и од редовите на фудбалскиот клуб Динамо Букурешт.
„Вториот тим на нашиот клуб, кој беше на пат кон кампот во Кампулунг, денес доживеа сообраќајна несреќа на пат кон тренинг. Возачот на минибусот ја изгубил контролата врз возилото, скршнал од патот и удрил во дрво, кое се наоѓало во близина. Врз основа на информациите што ги имаме, возачот доживеал срцев удар додека возел, што довело до губење на контролата. За жал, г-дин Константин Ковачиу, дел од медицинскиот тим на клубот, починал како последица на несреќата“, изјавија од клубот.
Од романскиот колектив дополнуваат дека се во постојан контакт со локалните власти.
„Сите други патници се пренесени во болница за понатамошни тестови. Играчите и тренерскиот персонал претрпеле повреди, но се надвор од животно-загрозувачка состојба. Во директен контакт сме со локалните служби и ќе се вратиме со најновите информации кога ќе ги имаме. Динамо сака да изрази сочувство не само до семејството на доктор Ковачиу, туку и до целата заедница на Динамо. Тој беше важен дел од тренерскиот персонал со години, а работеше и со сениорскиот тим“, заклучија од Динамо.
На местото на настанот интервенирале две противпожарни возила, повеќе екипи на итна медицинска помош, полициски патроли и еден хеликоптер.