Најмалку 90 рудари го загубија животот по силна експлозија на гас во рудникот за јаглен Лиушенју, кој се наоѓа во северниот дел на Кина.
Рудникот каде што се случила трагедијата е под директно управување на познатата групација „Тонгжу“ во кинеската покраина Шанкси.
Како што објави порталот 4news.mk, инцидентот се случил вчера точно во 19:29 часот по локално време, во моменти кога на должност во рударските јами биле вкупно 247 работници.
Веднаш по детонацијата, Кинеското Министерство за управување со вонредни состојби мобилизираше масовни ресурси за справување со последиците од несреќата.
На терен се испратени 345 професионални спасувачи поделени во шест екипи, а присутни се и бројни медицински тимови и амбулантни возила.
Спасувачките операции и потрагата по евентуални преживеани лица во овие моменти се одвиваат под исклучително висок ризик за екипите.
По повод големата трагедија реагираше и кинескиот претседател Шји Џинпинг, кој упати итен апел до сите надлежни служби на терен.
Џинпинг побара да не се штедат ресурси во лекувањето на повредените, да се спроведе итна и темелна истрага за причините, но и да има строга одговорност за виновниците.
Според последните извештаи на државните медиуми, комплетното раководство на рудникот е веќе приведено од страна на полицијата.
Првичните наоди од истрагата укажуваат дека во рудникот било регистрирано енормно ниво на јаглерод моноксид, што веројатно придонело за трагичниот исход.