Пет лица се водат како исчезнати по пожар што избувна во фабрика за храна во близина на Трикала, во централна Грција, соопштија од противпожарната служба.
Според информациите, во моментот кога избувнал пожарот во фабриката се наоѓале 13 лица, од кои осум успеале навреме да се евакуираат, додека по пет лица сè уште се трага.
Пожарот избувнал во раните утрински часови, а причините засега не се познати. Локалните медиуми јавуваат дека непосредно пред пожарот се слушнала силна експлозија, но оваа информација сè уште официјално не е потврдена.
На местото на настанот интервенирале околу 40 пожарникари со 13 противпожарни возила, а спасувачките екипи продолжуваат со пребарување на објектот.
Истрагата за причините за пожарот е во тек.