Неколку стотина граѓани на протест против Цементарница Усје. Побараа Министерството за животна средина да не и издава нова седумгодишна лиценца на компанијата бидејќи според Иницијативата „Стоп за Усје“ тоа би значело – нова лиценца по стари правила.
Дополнително, од Министерството за животна средина побараа поголема транспарентност во процесот. Велат и дека тоа е целосно недостапно за граѓаните.
Од Титан Усје, пак, велат дека во изминатите 15 години инвестирале 29 милиони евра во модернизација и заштита на животната средина.
Во март годинава ТИТАН Усје до Министерството за животна средина и просторно планирање ја поднесе апликацијата за продолжување на А-интегрираната еколошка дозвола, која е во согласност со важечките законските и подзаконските акти. Компанијата доследно, навремено и транспарентно ги спроведе сите постапки и активности предвидени со процедурата за продолжување на А-интегрираната еколошка дозвола, апликацијата е јавно достапна и ставена на увид на сите заинтересирани страни.ТИТАН Усје строго ги почитува сите обврски што произлегуваат од важечката регулатива и останува целосно посветена на усогласување со сите идни законски решенија што ќе стапат во сила. Компанијата со големо внимание ги следи сите законски промени и во меѓународното и во домашното законодавство и континуирано инвестира во нова технологија за да може да се усогласи на регулаторните барања, велат од Титан Усје.
Во текот на зимата, кога и аерозагадувањето е видливо со голо око, Иницијативата „Стоп за Усје“ одржа неколку протести пред Цементарницата со крајно барање за нејзина дислокација надвор од Скопје.