Официјалните податоци од Државниот завод за статистика потврдуваат дека економските политики на Владата даваат конкретни резултати на пазарот на трудот, соопшти пратеникот од ВМРО-ДПМНЕ, Бојан Стојаноски.
Тој посочи дека во првото тримесечје од 2026 година во Македонија се евидентирани 707.385 вработени лица, за разлика од второто тримесечје на 2024 година кога таа бројка изнесувала 691.736 лица, што претставува зголемување за близу 17.000 вработени.
Според презентираните статистички податоци, стапката на невработеност е намалена од 12,5 на 11,3 проценти, додека стапката на вработеност забележа раст од 45,6 на 46,5 проценти.
За остварување на овие резултати, како што појаснуваат од владејачката партија, клучна улога имаат активните мерки за поддршка на домашните компании, привлекувањето нови инвестиции и Оперативниот план за вработување за 2026 година, кој е вреден речиси 40 милиони евра и опфаќа над 10.000 лица.
Од вкупниот буџет за Оперативниот план, повеќе од 32 милиони евра се наменети директно за креирање нови работни места, со посебен фокус на младата популација до 29 години, каде се планира вклучување на речиси 6.000 лица.
Дополнително, за околу 3.500 млади лица до 23 години кои се вработени во производствените капацитети во земјава, предвиден е младински додаток во износ од 3.000 денари.
Преку мерките за самовработување и претприемништво на терен се очекува отворање на повеќе од 2.000 работни места, додека преку мерката за поддршка за креирање нови позиции треба да бидат опфатени уште над 1.500 лица.
Стојаноски направи ретроспектива и на резултатите од 2025 година, кога преку Програмата за самовработување со грант биле поддржани повеќе од 2.600 лица и биле отворени околу 2.200 нови деловни субјекти во државата.
„Не велиме дека сите проблеми се решени. Потребни се уште работа, инвестиции и реформи. Но денес имаме јасни показатели дека преземените мерки даваат резултати“, заклучи пратеникот на прес-конференцијата.