Владејачкото мнозинство предводено од ВМРО-ДПМНЕ, ВРЕДИ и ЗНАМ достави до опозицијата отворена понуда со која се согласува да прифати кој било модел за Изборниот законик, доколку Левица, СДСМ и ДУИ успеат меѓусебно да усогласат пречистен текст.
По одржаната средба во Собранието околу Изборниот законик, пратеникот на ВМРО-ДПМНЕ Бојан Стојаноски јавно порача дека се подготвени да ги прифатат сите инкорпорирани детали, со еден клучен услов.
– „Сето тоа коешто ќе го договорат Левица, СДСМ, ДУИ и другите помали опозициски партии од аспект на финансирање, од аспект на изјаснување на дијаспората, од аспект на поплаките и од аспект на една изборна единица и сите детали кои се инкорпорирани, ние тоа ќе го прифатиме се додека биде прифатен нашиот став, а тоа е дијаспората да може да го испочитува уставно загарантираното право и да може да гласа и да се изјаснува на избори“, истакна Стојаноски во изјавата за медиумите.
Владината коалиција смета дека целта е иселениците да можат да се изјаснат на многу помасовен начин отколку што тоа е овозможено со сегашното законско решение на терен.
Како модел за излез од сегашниот статус-кво во Собранието, Стојаноски побара опозициските партии да седнат на маса бидејќи веќе е очигледно дека нивните политички платформи се совпаѓаат во клучните насоки.
– „И ние понудивме вака – да седнат политичките партии коишто се дел од опозицијата, тоа се ДУИ, СДСМ, Левица, како и некои помали политички партии, и меѓу себе да се договорат за сите различности што ги имаат, отприлика четири клучни работи, бидејќи гледаме дека платформите им се исти, но се разликуваат во деталите“, потенцираше пратеникот.
Тој јасно ги мапираше четирите столбови каде опозицискиот блок мора да покаже усогласеност пред да го достави финалниот предлог-текст до парламентарното мнозинство.
– „Да седнат да се договорат за една изборна единица, да седнат да се договорат за модел на финансирање, да седнат да се договорат за поплаките и начинот на којшто тие би биле прифатливи, и да седнат и меѓу себе да се договорат дури и за моделот на изјаснување на дијаспората. Сето тоа коешто овие опозициски партии ќе го понудат до нас преку еден пречистен текст на закон, ние тоа ќе го прифатиме“, заклучи Стојановски.