Пратеничката од редовите на ВМРО-ДПМНЕ, Дафина Стојаноска на денешната собраниска седница и реплицираше на пратеничката од СДС, Јованка Тренчевска и ја праша зошто доколку Љупчо Николовски бил добар како министер во нивно време го разрешиле, како и дали е скандал обелоденувањето на некој скандал и неговото побрзо заташкување со цел да се скрие некој партиски војник или да се обелодени некој скандал и веднаш да се повика правдата и институциите да реагираат.
„Ако беше добар Љупчо Николовски како министер во ваше време, зошто го разрешивте? Па го ставивте за борба со корупција, па видовме како се избори со корупцијата. Да имавте вие министер за земјоделие како што е Цветан Трипуновски за овие две години немаше да седите во тие клупи таму и немаше сега да му се заканувате дека за скоро ќе седел таму. Не вие уште долго ќе седите таму, седите и молчете. Само немојте да мислите дека тука залегнати ќе и се скриете на правдата“, рече Стојаноска.
За време на говорот на Стојаноска од собраниската говорница, од своето место дофрлаше Љупчо Николоски од СДС, на што Стојаноска му одговори:
„Вас Ве видовме за две години повеќе од четири, и вие многу сте вознемирен, зошто, се плашите од нешто? Се плашите од правдата? Па нели вие требаше да ја воведете правдата во вашите седум години? Не ја воведовте. Затоа полека со доживувањата ќе Ве молам ако е можно, и затоа немојте да се заканувате, а најмалку барем вие. Затоа што народот го навикнавте кога вие нешто кажувате народот знае дека е спротивното од она што вие го кажувате. Зошто, не знам, веројатно затоа што сте биле „многу добар“ министер за земјоделие којшто во целото образложение на интерпелацијата еден поглед не упати кон актуелниот министер. Можеби е тоа моќта на потсвеста, можеби тоа говори во Вас дека сте исплашен и дека сега мислите со една интерпелација ќе кажете дека министерот Трипуновски не работел. За две години има сработено многу повеќе отколку вие, два пати по две што сработивте“.