На 25-годишнината од терористичките напади врз САД, на 11 септември 2001 година, американскиот Стејт департмент објави награда до 10 милиони долари за информации за „клучните лидери на Ал Каеда“.
„Бомбардирање на американски амбасади. Напади врз американски војници. Убивање на невини цивили. Помогнете да се запрат овие терористи. Поднесете дојава“, објави на платформата Икс програмата „Награди за правда“ на Стејт департментот.
Соопштението конкретно бара информации за осум лица за кои Стејт департментот наведува дека се „високи лидери на Ал Каеда, која го користи Иран како безбедно засолниште за спроведување насилни дејствија против САД и нивните сојузници“.
Стејт департментот соопшти дека луѓето кои ќе дадат информации би можеле да имаат право на парични награди, како и на преселување.
Во нападите од 11 септември 2001 година, членови на Ал Каеда киднапираа четири патнички авиони. Два авиона се урнаа во кулите на Светскиот трговски центар во Њујорк, еден во Пентагон, додека четвртиот се урна во близина на Шанксвил, Пенсилванија, а околу 3.000 луѓе загинаа во нападите.
Годишнината се одбележува во Соединетите Американски Држави со комеморативни собири, минута молчење и читање на имињата на жртвите