Во Основниот кривичен суд Скопје денеска започнува судскиот процес против Стојанче Јовановски, сопруг на Ивана Јовановска, која на 2 март си го одзеде животот скокајќи од шести кат заедно со нивната 6-годишна ќерка. Јовановски се товари за три тешки кривични дела, меѓу кои и „наведување на самоубиство и помагање во самоубиство“.
Судењето ќе го води судијата Ивица Стефановски, кој веќе и е познат на јавноста по процесот за убиствата на Вања Ѓорчевска и Панче Жежев.
„Обвинителството тврди дека од 2019 година, па сè до кобниот ден, обвинетиот во континуитет физички и психички ја малтретирал сопругата со која бил во бракоразводна постапка. Насилството се интензивирало во текот на 2025 и 2026 година, доведувајќи ја жртвата во состојба на целосна безизлезност“, се наведува во обвинението.
Според доказите, Јовановски ја тепал и понижувал Ивана дури и на јавни места, пред сведоци и пред нивната малолетна ќерка, со што директно придонел за трагичната одлука на жената.