Тешко семејно злосторство се случи денеска во Велико Градиште во Србија, каде припадник на граничната полиција, според српските медиуми, со пиштол ги убил својот зет и 19-годишната внука, а потоа се самоубил.
Во пукањето биле повредени уште две жени – сестрата на напаѓачот и мајката на неговиот зет. Тие биле пренесени во болница, а според првичните информации се во тешка состојба.
Досегашните информации упатуваат дека на трагедијата ѝ претходела семејна расправија околу имотни прашања. Злосторството се случило во куќа во слепа улица во Велико Градиште.
Случајот прва го забележала млада жена која поминувала со велосипед во близина и видела жена како неподвижно лежи пред куќата, по што биле известени надлежните служби.
Полицијата на местото пронашла три безживотни тела и две повредени жени. Во увидот учествуваат полицијата, екипи на Итната медицинска помош и двајца обвинители од Вишото јавно обвинителство во Пожаревац.