Началникот на Генералштабот на Вооружените сили на Германија, генерал Карстен Бројер, денеска ја започнува дводневната официјална посета на Македонија, при што ќе оствари повеќе средби со државниот и воениот врв.
Според агендата, германската делегација најпрво ќе биде пречекана во Генералштабот на Армијата со воени почести. Потоа ќе следуваат билатерални разговори меѓу генералот Бројер и началникот на Генералштабот на Армијата, генерал-мајор Сашко Лафчиски, како и средба со министерот за одбрана Владо Мисајловски.
По состанокот на двете воени делегации, предвидено е генералите Лафчиски и Бројер да се обратат на заедничка прес-конференција.
Во текот на посетата, германскиот генерал ќе има средби и со претседателката и врховен командант на Армијата, Гордана Сиљановска-Давкова, како и со премиерот Христијан Мицкоски.
Посетата е дел од продолжувањето на одбранбената соработка и партнерските односи меѓу Македонија и Германија.