Продлабочување на политичките и економските односи, зајакнување на евроатлантската соработка и силна поддршка за европската интеграција на Северна Македонија беа во фокусот на денешната средба меѓу министерот за надворешни работи и надворешна трговија Тимчо Муцунски и министерот за надворешни работи на Литванија Кестутис Будрис, кој престојува во официјална посета на земјава.
По средбата, двајцата министри оценија дека билатералните односи се одлични и со потенцијал за понатамошно продлабочување, особено во економската и трговската соработка. Беше нагласено дека отворањето на македонска амбасада во Вилнус претставува значаен чекор во унапредувањето на партнерството, а Литванија останува силен поддржувач на евроинтегративниот процес на земјава. Заеднички беше оценето и дека актуелните геополитички состојби бараат единство, засилена соработка и јасна ориентација кон европските вредности.
Министерот Муцунски истакна дека односите со Литванија се темелат на заеднички вредности и стратешка ориентација, при што посочи дека посетата претставува нов импулс во билатералните односи и отвора нови можности за соработка, особено во политичката, економската и секторската сфера.
Тој ја нагласи и континуираната поддршка од Литванија за европскиот пат на Северна Македонија, оценувајќи дека членството во ЕУ претставува прашање со пошироко безбедносно и геостратегиско значење.
Министерот Будрис истакна дека постои силна политичка и историска блискост меѓу двете земји и ја потврди поддршката за интеграцијата на Северна Македонија во Европската Унија. Тој најави дека проширувањето ќе биде еден од приоритетите за време на претстојното литванско претседавање со Советот на ЕУ, нагласувајќи дека земјата е на вистинскиот пат и ќе продолжи со поддршката за реформските процеси.