Српскиот претприемач Љубиша Каровиќ (61) преживеа вистинска драма кога за време на утрински лет на „Рајанер“ од Грција за Германија пукна прозорецот до неговото седиште.
Експлозијата од декомпресијата делумно го извлекла низ прозорецот на надморска височина од околу 4.500 метри и при брзина поголема од 600 километри на час.
Со видливи изгореници, модринки и ортопедска јака на вратот, Каровиќ се присеќава на моментот на инцидентот:
„Експлозијата е она што го паметам. Тоа е бучавата што претходи на хаосот, катастрофата. Кога ги затворам очите за да заспијам, го слушам постојано“, рече српскиот претприемач.
Според проценките, тој бил делумно надвор од авионот помеѓу минута и пол и две минути, а од сигурна смрт го спасил безбедносниот појас и брзата реакција на патниците.
„Имав среќа. Не се сеќавам многу, сè уште ме болат главата и вратот, но сум жив. Можеби ме спаси безбедносниот појас затоа што бев врзан. Или можеби беше судбина. Верувам во Бога и му се заблагодарувам секој ден“, рече Љубиша Каровиќ.
Неговиот адвокат Василис Киарас истакна дека Каровиќ се наоѓал помеѓу животот и смртта:
„Љубиша беше помеѓу животот и смртта. Кога кабината го изгуби притисокот, беше фрлен низ прозорецот до градите и веднаш ја изгуби свеста. Патуваше во Германија за роденденот на својот брат и заврши со главата и десната рака надвор од авионот на надморска височина од околу 4.500 метри, со брзина од повеќе од 600 километри на час. Ја погледна смртта во очи и се врати“, рече адвокатот.
Сопругата Светлана, која седела три реда зад него, раскажа дека патниците ги презеле сите чекори за да го спасат:
„Веднаш истрчав. Екипажот не помогна. Патниците помогнаа. Еден човек, мислам дека беше Албанец, беше неверојатен. Направи сè што можеше за да го врати внатре. Прво се обиде да ја затвори дупката со кеса, но воздухот веднаш ја издуваше. Потоа го стави куферот внатре и тоа функционираше. Ќе му бидеме вечно благодарни“, рече Светлана.
Каровиќ дополнува дека поради ненадејната промена на притисокот двапати се онесвестил, а лицето му било отечено.
Од авиокомпанијата „Рајанер“ тврдат дека екипажот постапил според протоколите и му помогнал на патниците штом авионот се спуштил на безбедна висина, организирајќи и лекарска помош при слетувањето во Солун.
Каровиќ, кој мора да носи протеза најмалку шест недели, порача дека очекува соодветна отштета за претрпената траума.
„Звукот од експлозијата и сликите од хаосот постојано ми се враќаат во сеќавање, но сакам да се опоравам. Секако, очекувам надомест. Не само е-пошта за промена на резервацијата за лет“, Љубиша Каровиќ изјави за Гардијан.
На крајот, тој упати и апел до сите што патуваат со авион:
„Секогаш врзувајте го безбедносниот појас. Не сакам никој да го доживее она што ми се случи мене.“