Административна грешка направена пред неколку децении во Србија предизвика огромен проблем за Србинка која живее во Австралија. Нејзиното семејство неодамна открило дека нејзиниот пол е погрешно запишан во официјалниот извод од матичната книга на родените, поради што сега таа не може да извади лични документи во странство.
Целиот случај стана јавен кога детето на жената се обратило за помош на интернет, барајќи совет како да се реши оваа необична ситуација. Проблемот бил откриен сосема случајно при контакт со српската дипломатска мисија.
„Неодамна добивме копија од нејзиниот извод од матичната книга на родените од српскиот конзулат во Сиднеј, кој покажува дека нејзиниот пол е запишан како машки наместо женски, а тие ни кажаа дека оваа грешка потекнува од самиот српски регистар“, се вели во објавата.
Оваа грешка во системот предизвика сериозни практични проблеми и го блокираше нејзиниот секојдневен живот во Австралија, каде што жената живее уште од минатиот век.
„Тоа моментално ѝ предизвикува проблеми во Австралија додека се обидува да добие лична карта со фотографија и пасош (таа никогаш немала пасош бидејќи дошла во Австралија со пасошот на нејзиниот татко во 1970-тите)“, беше објаснето во апелот за помош.
Семејството сега бара правно решение и начин итно да ги исправи податоците во матичните книги во Србија, за жената конечно да може да го докаже својот идентитет и да ги добие документите што ги чека со децении.