Три лица, меѓу кои две малолетни лица на 15-годишна возраст и едно 18-годишно лице, денеска биле однесени од надојдената вода на реката Треска, откако бил зголемен испустот од браната „Матка“ за потребите на производство на електрична енергија.
Како што соопшти Центарот за управување со кризи, преку Единствениот број за итни повици 112 била примена пријава за настанот. Едното малолетно лице веднаш било извлечено од водата, додека другите две биле пронајдени низводно по течението на реката.
Сите три лица се спасени, живи се и немаат видливи повреди.
По добивањето на пријавата, ЦУК ја координирал интервенцијата, при што биле ангажирани Министерството за внатрешни работи, Дирекцијата за заштита и спасување, Општина Сарај, ХЕЦ „Матка“, Бригадата за противпожарна заштита на Град Скопје и Итната медицинска помош.
Во акцијата за спасување учествувале пожарникари, полициски службеници, медицински екипи и жители на Општина Сарај, а директорот на ЦУК, Али Мухамет, бил на местото на настанот и ја координирал интервенцијата.
Од Центарот за управување со кризи апелираат граѓаните да бидат особено внимателни при престој покрај реките и езерата, особено во близина на брани и хидроенергетски објекти, каде што нивото и брзината на водата можат нагло да се променат поради контролирани испусти.