Пратеникот и координатор на пратеничката група на СДСМ, Оливер Спасовски, во своето гостување во „Тема на денот“ на Сител Телевизија, упати остри критики кон владејачкото мнозинство во врска со предложените законски измени за двојните државјанства и најавеното укинување на техничката влада.
Спасовски истакна дека СДСМ начелно го поддржува законското решение за забрана за двојно државјанство на функционерите, но со два клучни услова: тоа да важи веднаш за актуелниот пратенички состав и да се прошири на извршната власт.
„Поднесовме нов закон по којшто, покрај пратениците и министрите од Владата ќе мора да докажат дека имаат само едно државјанство, или тој што има повеќе државјанства да не може да биде дел од извршната власт“, изјави Спасовски.
Тој ја обвини власта за неконзистентност и манипулација со јавноста, посочувајќи на конфузијата во Собранието околу надлежните комисии за овој закон, како и на менувањето на ставовите на премиерот Христијан Мицкоски.
„Пратеничката група на ВМРО-ДПМНЕ поднесува ваков закон, премиерот истиот ден вика дека се избрзало и треба да се консултираат експерти. Претседателката вика дека тоа е потребно, па и премиерот потоа вели ‘да, така е’. Денеска едно, за два часа нешто поинаку. Тоа е евтин популизам заради лажен патриотизам“, нагласи Спасовски.
Во однос на Законот за Влада, Спасовски го повтори цврстиот став на СДСМ против укинувањето на техничката (Пржинска) влада. Тој потсети дека овој механизам бил усогласен меѓу четирите најголеми партии и гарантиран од ЕУ и САД за да се обезбеди фер изборен циклус.
Спасовски посочи и на еден парадокс – во 2018 година, токму на барање на Христијан Мицкоски, одредбите за преодна влада биле продолжени да важат сè до влезот на Македонија во ЕУ. „Сега, одеднаш, тој став не важи за ВМРО-ДПМНЕ и брзаат без никаква дебата да го укинат“, заклучи координаторот на пратеничката група на СДСМ.