Пратеникот и поранешен министер за внатрешни работи, Оливер Спасовски, упати остра осуда за вандализирањето на просториите на Културно-уметничкото друштво „Српски вез“ во Куманово, оценувајќи го овој чин како неприфатлив.
Спасовски преку социјалните мрежи порача дека ваквите постапки не смеат да ги нарушат меѓуетничките односи во градот.
„Најостро го осудувам вандализирањето на просториите на КУД „Српски вез“ во Куманово. Ваквите постапки се неприфатливи и не смеат да бидат причина за нарушување на меѓуетничките односи и соживотот по кои Куманово е препознатливо. Верувам дека станува збор за изолиран инцидент кој не ги отсликува вредностите на нашите граѓани“, истакна Спасовски.
Тој побара брза реакција од полицијата и надлежните органи за пронаоѓање на одговорните за овој инцидент.
„Очекувам надлежните институции брзо и темелно да го расчистат случајот, да ги утврдат сторителите и да постапат согласно законот. Само со навремена и одлучна реакција ќе испратиме јасна порака дека нема место за омраза, вандализам и провокации“, наведе Спасовски во својата реакција.