Изборот на нов прв човек на Општиот јавен обвинителство за гонење организиран криминал и корупција (ОЈО ГОКК) влегува во официјална завршница. Сите јавни обвинители низ државата за точно еден месец ќе треба да го дадат својот глас за наследникот на актуелниот шеф Ислам Абази, чиј четиригодишен мандат истекува на 8 ноември годинава.
Поради законската обврска огласот да биде објавен најмалку 90 дена пред истекот на функцијата, Советот на јавни обвинители веќе ја започна постапката.
На последната одржана седница е донесена одлука за распишување на огласот, кој официјално ќе биде активен од 10 август, по неговата објава во „Службен весник“. Од тој момент, сите заинтересирани обвинители кои ги исполнуваат законските критериуми ќе имаат рок од 15 дена да ги поднесат своите кандидатури.
Гласање на сите обвинители според Законот за јавно обвинителство
Ова ќе биде вторпат во историјата обвинителите непосредно и преку гласање сами да си го избираат раководителот на ова клучно обвинителство.
Законските рамки и процедурата за спроведување на изборот се јасно дефинирани:
„Основен јавен обвинител на Основното јавно обвинителство за организиран криминал и корупција се избира од Советот на јавни обвинители, по спроведено гласање на сите јавни обвинители во Република Северна Македонија. Советот на јавни обвинители го именува за основен јавен обвинител на Основното јавно обвинителство за гонење организиран криминал и корупција кандидатот што освоил најмногу гласови од листата на пријавени кандидати што ги исполнуваат условите во согласност со овој закон“, пишува во членот 66 од Законот.
Мандат од четири години и формирање на Комисија за гласање
Новиот шеф на ОЈО ГОКК ќе добие четиригодишен мандат со право на повторен реизбор, а постапката бара целосна транспарентност и посебна комисија за спроведување на изборниот процес.
Во законските одредби понатаму се прецизираат чекорите по завршувањето на огласот:
„– За избор на основен јавен обвинител на Основното јавно обвинителство за гонење организиран криминал и корупција, Советот на јавни обвинители распишува оглас што се објавува во „Службен весник на Република Северна Македонија“ и во најмалку две јавни гласила од кои едно е на службен јазик различен од македонскиот кој го зборуваат најмалку 20 отсто од граѓаните на Република Северна Македонија. По завршување на огласот, Советот на јавни обвинители изготвува листа од пријавените кандидати што ги исполнуваат условите предвидени со овој закон. Советот на јавни обвинители формира Комисија за спроведување на гласањето за избор на основен јавен обвинител на Основното јавно обвинителство за гонење организиран криминал и корупција – предвидува Законот.“