Собраниската Комисија за економски прашања, труд и енергетска политика оствари средба со претставници од Француската бизнис-конфедерација – МЕДЕФ, при што во фокус беа транспортната инфраструктура (железници и патишта), енергетиката и обновливите извори на енергија, како и управувањето со води, животната средина и третманот на отпад и отпадни води.
Претседателот на Комисијата Бојан Стојаноски изрази задоволство што претставниците доаѓаат од Франција, една од водечките економии во Европската Унија, која претставува најголем трговски партнер на земјава.
Тој информираше за два крупни енергетски проекти – изградбата на хидроелектраната „Чебрен“ на Црна Река и проектот „Вардарска долина“, кој предвидува изградба на 12 хидроелектрани долж реката Вардар, истакнувајќи дека нивната реализација би придонела за трансформација на енергетскиот сектор и забрзување на зелената транзиција.
Францускиот амбасадор Кристоф ле Риголер ја нагласи заинтересираноста на француските компании, меѓу водечките во своите области, за учество во долгорочни инфраструктурни и енергетски проекти, со акцент на потребата од институционална поддршка.
Претседателот на Деловниот совет Кристоф Пети посочи дека потпишување меѓувладин повеќесекторски договор со Франција би овозможило поефикасна реализација на проекти, поедноставување на процедурите и поголемо вклучување на домашни кадри.
На средбата беа презентирани и решенија од француските компании во областа на дигитален и физички идентитет, складирање енергија, здравствени установи, транспорт, железничка инфраструктура и заштита на животната средина.
Двете страни оценија дека ваквата соработка има стратешко значење, бидејќи би придонела за привлекување инвестиции, трансфер на знаење и влез на меѓународни компании на домашниот пазар.