Собранието на Република Северна Македонија денеска ја продолжува 104-тата седница, при што пратениците ќе расправаат по точките утврдени на дневниот ред.
На седницата се предвидени повеќе предлог-одлуки за избори и именувања во различни институции и тела, меѓу кои избор на член во Државниот совет за превенција на детско престапништво и правда за деца, избор на член на Државната комисија за спречување на корупцијата, како и членови на Комисијата за спречување и заштита од дискриминација и Судскиот совет.
Пред пратениците се и предлог-одлуки за измени во составите на собраниските комисии и пратеничките групи за соработка со парламенти на други држави, како и одлука за објавување јавен оглас за избор на членови во Советот за граѓански надзор.
Во рамки на дневниот ред ќе се разгледуваат и повеќе законски решенија во прво читање, меѓу кои предлог-законите за парнична постапка, судска и јавнообвинителска служба, соодветна и правична застапеност, игрите на среќа, како и измени на законите за аудио и аудиовизуелни медиумски услуги, ДДВ и возила.
Пратениците ќе расправаат и по повеќе законски предлози по скратена постапка кои се однесуваат на области како управување со конфискуван имот, електронски комуникации, судство, градежништво, енергетска ефикасност, угостителство, земјоделство и урбанистичко планирање.
Меѓу точките е и предлог-кодексот за етичко однесување на пратениците, како и измените и дополнувањата на Стратегијата за регионален развој 2021–2031 година.