Собранието денеска ќе одржи три седници – 109., 105. и 104., на кои пратениците ќе разгледуваат повеќе предлог-закони, одлуки и извештаи.
На 109. седница на дневен ред се измените на одлуката за продолжување на кризната состојба, дополнетиот Предлог-закон за игрите на среќа и забавните игри, измените на Законот за испитување и жигосување на огненото оружје и муницијата, како и Предлог-законот за јавни претпријатија и трговски друштва во државна сопственост.
На 105. седница, по утврдувањето на дневниот ред, опозициските пратеници ќе поставуваат пратенички прашања.
Во рамки на 104. седница ќе се разгледуваат Предлогот за избор на член на Судскиот совет, Предлог-законот за соодветна и правична застапеност во прво читање и измените на Законот за судовите.