Собранието ги усвои измените на Законот за безбедност на сообраќајот на патиштата, со кои за првпат детално и строго се уредува користењето на лесните електрични возила во државата. Новите законски решенија доаѓаат по бројните реакции од граѓаните за несовесно возење во урбаните средини, особено од страна на малолетници.
Според новите правила, право на управување со електричен тротинет ќе имаат исклучиво полнолетни лица.
„Само полнолетни ќе смеат да управуваат електрични тротинети, максималната брзина се ограничува на 20 километри на час, се забранува превоз на второ лице, а за прекршителите се одредени казни. Собранието го усвои измените на Законот за безбедност на сообраќајот на патиштата, со кој првпат детално се уредува користењето на лесните електрични возила.“
Движењето на тротинетите примарно ќе се одвива по велосипедски патеки, а по тротоари ќе биде дозволено само ако нема соодветна инфраструктура, и тоа со брзина до 6 километри на час. Се воведува и забрана за возење без двете раце на управувачот, како и за користење на телефони и слушалки при возењето.
Законот предвидува строги санкции и за родителите доколку нивните деца направат сообраќаен прекршок на патот.
„Доколку прекршок направи дете, казната нема да ја плати само малолетникот. Во зависност од прекршокот, родителот или старателот ќе биде санкциониран со 50, 80 или 120 евра, со што се воведува и нивна директна одговорност за почитувањето на правилата.“
Возачите задолжително ќе мора да носат заштитен шлем, а ноќе и рефлектирачки елек. За непочитување на правилата за движење казната изнесува 80 евра, додека за брзо возење глобата е 120 евра.