Собранието со мнозинство гласови ја изгласа потребата од носење на Предлог-законот за Судскиот совет, со што законот се проследува во второ читање.
Министерот за правда, Игор Филков, изјави дека со овој закон Министерството започнува „нова ера на работа и функционирање“ преку отворен, јавен и транспарентен процес на изготвување суштински закони.
Тој ги наведе клучните новини предвидени со Законот, кои се во согласност со препораките на ЕУ:
- Јавност во постапката за разрешување на претседател на Судскиот совет.
- Воведување јавна расправа при избор на не-судски членови за поголема транспарентност и одговорност.
- За прв пат прецизирање на критериумите за избор на „истакнат правник“.
- Зајакнување на критериумите за избор, одговорност и разрешување на членови на Советот од редот на судиите.
- Јасно прецизирање на постапката за дисциплинска одговорност на судиите и на членовите на Судскиот совет.
- Воспоставување обврска Судскиот совет да ги прецизира, индивидуализира и образложи одлуките за избор и одговорност на судиите.
- Утврдување на рокови за преземање дејствија за дисциплинска одговорност и прецизирање на постапката за жалба.
Филков изрази жалење што дел од опозицијата не присуствувала на седницата за носење на овој „исклучително важен закон кој е дел од Реформската агенда“.