ЈУ Национален парк „Пелистер“, со поддршка на поединци и компании, започна со изградба на нов објект за мониторинг и времен престој на посетителите на планината Баба.
Новиот објект се гради во непосредна близина на црквата „Св. Спас“ над селото Маловишта, на надморска височина од 1.886 метри.
Од националниот парк информираат дека деновиве и во текот на изминатиот викенд со висок интензитет се одвивале работните активности на терен.
Транспортот на градежните материјали се одвивал во специфични услови поради непристапноста на планината.
Првиот човек на паркот ги појасни деталите за самата градба и следните чекори на теренот:
„Активностите се реализираа на исклучително тежок терен, под врвот Вртушка, до која за транспорт на потребните материјали и алат се користеа коњи со кои беа пренесени греди, камен и други потребни делови за објектот. За време на викендот ја подигнавме рамката на објектот, а ќе продолжиме и со другите проектирани активности, информира Иванчо Тошевски, директор на ЈУ Национален парк „Пелистер“ Битола.“
Врвот Вртушка и црквата „Св. Спас“ важат за едни од најпосетуваните локации во рамките на НП „Пелистер“ во сите периоди од годината.
Покрај тоа што ќе им служи за засолниште на планинарите, објектот ќе се користи и за поставување опрема за заштита на природата и мониторинг.