Министерот за транспорт, Александар Николоски, информираше за текот на градежните работи на автопатот Прилеп – Битола, посочувајќи дека овој стратешки проект, кој е дел од Коридорот 10Д, станува симбол на развојот на Пелагонија.
Според неговите најави, на терен се работи сè поинтензивно со цел економски да се поврзе целиот регион и да се отворат нови можности за бизнисот и туризмот.
„Со овој автопат патувањето од Скопје до Атина се намалува за 3-3,5 часа. Тоа значи многу повеќе бизнис и туристи за цел регион! Ова е најдолгата поединечна делница автопат што се гради во Македонија“, соопшти Николоски.
Министерот ги објави и прецизните рокови и плановите за пуштање во употреба на првите километри од оваа значајна патна артерија.
„Нашата цел е првата половина на 2027 година да имаме пуштено во функција 10,5 км, а исто така во тек на следната година сообраќајот по целата должина од 40 км да се одвива по една коловозна лента“, истакна тој.
Како што додава Николоски, новиот автопат ќе донесе побезбеден и побрз сообраќај, подобра поврзаност и поголема конкурентност на домашното стопанство.
Тој потенцираше дека Пелагонија е еден од најважните региони во државата и затоа се инвестира во модерна инфраструктура која ќе обезбеди подобар живот за граѓаните и нови перспективи за идните генерации.