Марко Маринковиќ-Слаткар го испрати својот пријател и колега Владо Јаневски во вечниот дом, па објави трогателна порака на Инстаграм и дел од песна која била напишана за него и Владо.
-Денес, кога го испративме Владо, сфатив колку работи останале недовршени.
Со години чувам една песна што ја снимивме заедно. Не затоа што не верував во неа, туку затоа што секогаш кога работам со некој што неизмерно го ценам, сакам да го дадам својот максимум.
Постојано мислев дека може уште подобро и затоа ја одложував, убеден дека ќе имаме време повторно да работиме на неа.
За жал, тоа време не дојде.
Ова е само мал дел од песната.
Ветувам дека ќе ја довршам и ќе ја објавам на неговиот роденден.
Фала ти за довербата, Владо.
Фала ти за сè што направи за сите нас.
Ќе ми недостигаш. На сите ќе ни недостигаш, напиша Слаткар.
Владо Јаневски почина по кратко боледување, а голем број пријатели, фанови и колеги се простија од него.
Тој беше погребан вчера на гробиштата во Бутел.
Македонската музичка сцена изгуби едно од своите најголеми и најпрепознатливи имиња. Познатиот музичар и пејач кој себе остави богата музичка кариера со безброј хитови кои ја одбележаа македонската поп-музика во изминатите неколку децении.
Тој важеше за еден од најдобрите кантавтори и вокалисти на овие простори, чии рефрени се пеат од многу генерации.