Македонија и Србија утре ќе го потпишат договорот за реализација на интерконекторскиот гасовод меѓу двете земји, со што треба официјално да почне проектот за ново гасно поврзување кон север. На настанот ќе присуствува и премиерот Христијан Мицкоски, соопшти Владата.
Проектот е дел од поширокиот план Македонија да стане транзитна точка за природен гас од југ кон Србија и Централна Европа. Според најавите на Мицкоски, земјава до почетокот на 2028 година треба да биде поврзана со терминалот за течен природен гас во грчки Александруполис.
Македонија веќе работи на интерконекторот со Грција, преку кој домашниот гасоводен систем треба да добие пристап до ЛНГ-терминалот во Александруполис. Потоа, преку новата врска со Србија, гасот би можел да продолжи кон Централна Европа, вклучително и кон Унгарија и Австрија.
Мицкоски неодамна изјави дека Македонија има резервирано четири капацитети на терминалот во Александруполис и дека северниот интерконектор е неопходен за земјата да стане дел од поширок регионален коридор за снабдување со гас.
Планираниот капацитет на гасоводот кон Србија е меѓу три и шест милијарди кубни метри природен гас годишно. Според премиерот, преку оваа инфраструктура би можел да се транспортира и американски течен природен гас од Александруполис кон Србија и понатаму кон земјите од Централна Европа.
Проектот има и пошироко енергетско и геополитичко значење, бидејќи отвора дополнителна рута за снабдување на регионот со гас кој не доаѓа од Русија. Македонија северниот интерконектор со Србија ќе го развива со сопствени буџетски средства.
Со изградбата на врските со Грција и Србија, Македонија треба од земја која главно е краен корисник на гас да стане дел од транзитен коридор кој ќе го поврзува Егејското Море со пазарите во Централна Европа.