Потпишан е договорот за набавка на 3.300 нови контејнери за потребите на Скопје, со што започнува една од најголемите набавки од ваков тип во изминатите неколку години.
Целта на оваа инвестиција е унапредување на системот за собирање и управување со отпадот во главниот град, овозможувајќи почисти населби, намалување на смет околу садовите за отпад, како и поефикасно и навремено празнење од страна на екипите на ЈП „Комунална хигиена“ – Скопје.
За споредба, во изминатите 12 години биле набавени вкупно околу 1.300 контејнери, што беше недоволно за потребите на градот и резултираше со преполни и оштетени садови, како и нарушена комунална слика во повеќе населби.
Новите контејнери се набавуваат по цена од 9.600 денари по парче. Од градските власти истакнуваат дека ова претставува значително поекономично искористување на средствата, со оглед на тоа што претходно набавуваните контејнери чинеле над 18.000 денари по парче.
Набавката е дел од пошироките активности за модернизација на ЈП „Комунална хигиена“ – Скопје, по претходно реализираната набавка на нови комунални возила.