Проширувањето на системот „Безбеден град“ продолжува во уште неколку градови низ државата со цел да се намали бројот на тешки сообраќајни незгоди, информираше денеска пратеникот на ВМРО-ДПМНЕ, Александар Велјановски. Според партиските податоци, досегашната примена на системот веќе покажува конкретни резултати на терен.
Како што се наведува во партиското соопштение, крајната цел е преполовување на смртните случаи и сериозните повреди на патиштата до 2030 година.
„Владата предводена од ВМРО-ДПМНЕ останува посветена на безбедноста на граѓаните и на спроведување политики кои даваат резултати. Дека системот функционира, тоа го потврдуваат и самите бројки. Во текот на првите пет месеци од неговата примена, бројот на загинати во сообраќајни незгоди е намален за 40%, од 55 загинати во истиот период лани, на 33 годинава“, се вели во соопштението на ВМРО-ДПМНЕ.
Од владејачката партија појаснуваат дека по Скопје, Куманово, Тетово, Велес и коридорите 8 и 10, камери веќе се поставуваат и во други региони.
„Минатата недела, камери беа поставени на автопатот кај Ново Село во општина Дебарца, а истовремено започна и постепено воведување на системот во Охрид. Безбедноста на граѓаните и понатаму останува приоритет, а ‘Безбеден град’ е само еден од конкретните чекори за постигнување на целта. Истиот ќе биде ставен во функција во секој еден град низ Македонија“, изјави пратеникот Велјановски.