„Мора да продолжиме со дијалогот и за најчувствителните теми“, порача претседателката Гордана Сиљановска-Давкова во објава на социјалните мрежи по средбата со бугарската потпретседателка Илијана Јотова. Средбата се одржа на маргините на Самитот на Процесот за соработка во Југоисточна Европа (ПСЈИЕ) во Софија.
Како што посочи Сиљановска-Давкова, главна тема на разговорот биле предизвиците во билатералните односи меѓу двете земји, особено прашањата поврзани со македонскиот евроинтеграциски процес.
„Разменивме различни гледишта околу можните решенија за отворање на пристапните преговори на Македонија со Европската Унија“, наведе претседателката.
Таа ја нагласила и потребата од поинтензивна соработка и комуникација меѓу образовните институции, универзитетите, научните и културните организации, граѓанскиот сектор и граѓаните, со цел надминување на предрасудите и поттикнување на меѓусебното разбирање.
Сиљановска-Давкова ја истакнала и важноста од почитување и спроведување на пресудите на Европскиот суд за човекови права во Стразбур, посочувајќи дека тоа е обврска на сите земји членки на Советот на Европа.
„Треба да продолжиме да разговараме и за тешките прашања“, порача претседателката.