Претседателката Гордана Сиљановска-Давкова, која престојува во официјална посета на Република Словенија, денеска во Љубљана ќе биде пречекана со највисоки државни и воени почести од нејзината словенечка колешка, Наташа Пирц Мусар.
Според агендата, предвидено е двете претседателки да одржат тет-а-тет средба, по што ќе следува и пленарен состанок на македонската и словенечката делегација.
Во рамки на официјалниот дел од посетата, Сиљановска-Давкова ќе оствари средба и со претседателот на Државниот збор на Република Словенија, Зоран Стевановиќ.
Предвидено е македонската претседателка да положи венец пред Споменикот на жртвите од сите војни и жртвите поврзани со војните во Словенија.
Посетата започна уште во текот на вчерашниот ден, кога Сиљановска-Давкова ја посети Македонската православна црква „Св. Климент Охридски“ во Љубљана, каде се сретна со членовите на Сојузот на Македонските културни друштва и Црковните одбори.
Таа оствари средби и со голем број македонски иселеници кои работат и дејствуваат во областа на науката, културата и медицината во оваа земја.
Во текот на вчерашното попладне, претседателката одржа состанок и со членовите на Македонско-словенечкиот бизнис клуб, а во вечерните часови го посети Македонското културно друштво во Крањ.
Официјалната посета продолжува и утре, кога претседателката Сиљановска-Давкова ќе одржи предавање на Правниот факултет во Љубљана на тема: „Уставни трансформации на патот кон ЕУ: Реформи или уставен инженеринг?“.