Претседателката Гордана Сиљановска-Давкова синоќа во Народната канцеларија во Скопје се сретна со лица со Алцхајмерова болест и членови на нивните семејства, во рамки на настанот „Алцхајмер Матине – Она што останува: љубов, емоција, емпатија“.
Настанот, организиран од Институтот за Алцхајмерова болест и невронаука, се одржа по повод месецот посветен на подигнување на свеста за Алцхајмеровата болест.
На настанот се обратија и министерката за образование и наука Весна Јаневска, министерот за здравство Сашо Клековски и претседателката на Институтот за Алцхајмерова болест и невронаука, проф. д-р Габриела Новотни.
Сиљановска-Давкова им посака добредојде на присутните во Народната канцеларија, која ја опиша како дом на граѓаните, и им изрази благодарност на семејствата и блиските за грижата и поддршката што им ја даваат на лицата со Алцхајмерова болест.
Таа сподели и искуство од својата професионална кариера, посочувајќи пример на колешка од Швајцарија која, и покрај тоа што живеела со Алцхајмерова болест, отворено ја поддржувала македонската страна, бранејќи ги правото, правдата и етиката.
Претседателката ја истакна важноста на напредокот на медицината во справувањето со болеста, но и значењето на поддршката од најблиските.
„Зборот, насмевката, звукот, гестот, љубовта, со еден збор, имаат незаменливо лековито дејство“, истакна Сиљановска-Давкова.
Министерката Јаневска рече дека на настанот не присуствувала како министерка, туку како човек кој одблизу се соочил со болеста. Таа го сподели своето лично искуство со сопругот и зборуваше за предизвиците со кои се соочуваат лицата со Алцхајмерова болест и нивните семејства, изразувајќи поддршка за сите кои се соочуваат со оваа болест.
Проф. д-р Габриела Новотни ја нагласи потребата од рана дијагноза, современа терапија и организирана грижа по поставувањето на дијагнозата. Таа посочи дека Алцхајмеровата болест не го засега само лицето со дијагноза, туку и целото семејство.
„Ако ги обединиме науката, добрите темели во здравството и образованието и ако на сето тоа додадеме љубов, човечност и емпатија, сигурна сум дека ќе направиме систем во кој сите семејства кои се соочиле со деменцијата ќе живеат малку подобар живот, и покрај болката и страдањето што ги носи болеста“, порача Новотни.
Настанот ја истакна потребата од поголема општествена свест, разбирање и солидарност, како и од континуирана поддршка за лицата со Алцхајмерова болест и нивните семејства.