Претседателката Гордана Сиљановска-Давкова денеска ќе учествува на состанокот на Северноатлантскиот совет на ниво на шефови на држави и влади, кој се одржува во рамки на Самитот на НАТО во Анкара. Таа ќе има свое обраќање пред лидерите на земјите-членки на Алијансата.
Во пресрет на официјалниот дел од самитот, претседателката присуствуваше на свечениот прием што го организираше турскиот претседател Реџеп Таип Ердоган за учесниците на собирот.
„Во атмосфера на сојузништво и меѓусебна доверба разменивме ставови за иднината на евроатлантската безбедност, за унапредување на колективната одбрана и за зацврстување на трансатлантското партнерство. Верувам дека преку заедничка посветеност и одговорност можеме да придонесеме за поголема стабилност, мир и безбедност“, напиша Сиљановска-Давкова на својот Фејсбук профил.
Македонската делегација на Самитот ја сочинуваат и министерот за одбрана Владо Мисајловски, министерот за надворешни работи и надворешна трговија Тимчо Муцунски, како и началникот на Генералштабот на Армијата, генерал-мајор Сашко Лафчиски.
Главните теми на овогодишниот Самит се зајакнувањето на колективната безбедност на Алијансата, зголемувањето на вложувањата во одбраната, развојот на одбранбената индустрија, модернизацијата на воените капацитети и продолжувањето на поддршката за Украина.
За време на престојот во Анкара, претседателката ќе има и билатерални средби со повеќе лидери на земјите-членки на НАТО.
На дводневниот Самит присуствуваат лидерите на сите 32 земји-членки на Алијансата, меѓу кои и американскиот претседател Доналд Трамп, францускиот претседател Емануел Макрон, британскиот премиер Кир Стармер, германскиот канцелар Фридрих Мерц, италијанската премиерка Џорџа Мелони, канадскиот премиер Марк Карни, како и генералниот секретар на НАТО Марк Руте и претседателот на Европскиот совет Антонио Кошта.
Покрај шефовите на држави и влади, на Самитот учествуваат и десетици министри, високи дипломати, претставници на меѓународни организации, како и неколку илјади делегати и медиумски екипи од целиот свет.