Претседателката Гордана Сиљановска Давкова го поддржува предлогот за ограничување на двојното државјанство за пратениците, но смета дека тој принцип треба да биде проширен и на останатите носители на високи државни функции.
Во нејзиниот став, претседателката појаснува дека не станува збор за целосно укинување на правото на двојно државјанство, туку за концепт на „замрзнување“ на ова право додека лицето ја извршува државната функција.
Ограничувањето треба да се однесува на претседателот, премиерот, министрите и пратениците.
Функционерите нема да мора да се откажат од второто државјанство, туку истото би било во мирување (замрзнато) додека трае мандатот.
Претседателката сугерира дека ваквите ограничувања може да се уредат преку посебни закони, по примерот на веќе постоечките регулативи за одредени безбедносни функции каде што веќе се применуваат строги критериуми за конфликт на интереси.
Со овој пристап, Сиљановска Давкова се залага за поширока дебата која би го заштитила интегритетот на државните институции, без притоа целосно да им ги ускрати правата на граѓаните кои поседуваат второ државјанство.