Претседателката Гордана Сиљановска-Давкова денеска се обрати на чествувањето на 2 Август – Илинден, што под нејзино покровителство се одржа пред споменикот на Методија Андонов – Ченто на плоштадот „Македонија“ во Скопје.
Во своето обраќање таа ја нагласи важноста на Илинден и АСНОМ, посочувајќи дека слободата е извојувана со сопствени сили.
„Нашата народноослободителна борба беше епохално, автентично дело, а слободата не ни беше подарена од некој друг, туку сами се ослободимe со нашата 120 000 бројна народноослободителна војска. Значи, никому не му должиме за тешко изборената држава. Токму затоа, никој нема право да ја ревидира нашата национална историја оти секој народ, па и македонскиот, има право на своја историја“, рече Сиљановска-Давкова.
Шефот на државата се осврна на ликот и делото на Методија Андонов – Ченто, потсетувајќи на неговата судбина и политичкиот прогон.
„Денес сигурно знаеме дека со својата принципиелност, конзистентност и доследност, тој стекнал некои непријатели меѓу моќните носители на власта, за жал, негови довчерашни соборци. Да потсетам дека со монтиран судски процес, нему му е судено и пресудено за ставови и идеи коишто се идентични со одлуките на Првото заседание на АСНОМ. Прашувам: Може ли Ченто да биде кривично одговорен пред македонскиот народен суд за идеите на АСНОМ? Се разбира, не, но владејачката политичка номенклатура и зависното, комунистичко судство му пресудиле со партиска пресуда, а не според Уставот и законите“, истакна претседателката.
Таа додаде дека зачувувањето на државата бара вложување во младата генерација и борба против корупцијата.
„Државата се чува со вложување во младите. Токму младите се изборија за слободата и ја создадоа државата. Речиси половина од асномците биле помлади од 30 години. За жал, денес, најперспективните млади луѓе масовно се иселуваат во потрага по пристојно место за живеење. Некои, поради блокираните евроинтеграции, посегаат и по пасош од други држави членки. Наша должност е да се бориме против корупцијата и организираниот криминал, против партократијата, ама и против загадувањето. Само кога знаењето и успехот ќе бидат поважни од книшката и познанствата, младите ќе останат да живеат, да работат и да создаваат семејства тука, дома“, посочи Сиљановска-Давкова.
Во однос на евроинтеграциите и надворешната политика, претседателката нагласи дека блокадите се штетни за сите страни.
„Знаеме дека секоја земја кандидат прави компромиси врзани за адаптирање на односите и процесите на акито или решавање на различни спорови. Но нашето искуство има уникатен предзнак, како постојана и незавршена низа од барања со коишто се оспорува и се нарушува нашето суверено право на самоопределување. Но, факт е дека не само ние, со блокадата на нашата евроинтеграција, туку и оние што нè блокираат – губат. Губиме сите“, подвлече таа.
На крајот, претседателката ги цитираше зборовите на Ченто изречени на Третото заседание на АСНОМ.
„Служејќи за доброто на нашиот народ, ние служиме за доброто на државата. Това което народот ни го е дал ние треба да го оствариме за вечни времиња. Само така можеме да одиме напред во прогрес…“, заврши Сиљановска-Давкова.
Делегации од нејзиниот Кабинет присуствуваа и на одбележувањата на Илинден во Крушево, Пелинце, манастирот „Св. Прохор Пчински“ и Смилево.