Претседателката Гордана Сиљановска-Давкова, во рамките на официјалната посета на Република Словенија, денеска во Љубљана одржа заедничка прес-конференција со словенечката претседателка Наташа Пирц Мусар, од каде испрати јасна порака во врска со македонските евроинтеграции.
Сиљановска-Давкова истакна дека Словенија е инспиративен пример за мала европска држава со стабилни демократски институции, при што потврди дека билатералните односи се одлични, со голем потенцијал за продлабочување на соработката во економијата, образованието, науката, културата и туризмот.
Претседателката се осврна на македонската заедница во Словенија, нагласувајќи ја нивната сè поактивна општествена и политичка улога преку учество во општинските совети и во Националното собрание.
Во однос на европската интеграција на Македонија, таа јасно укажа на предизвиците со кои се соочува земјава на тој пат.
„Она што сакам да го потенцирам е да укажам на опасноста од билатерализацијата на процесот на проширувањето, особено кога таа е врзана за идентитетските прашања, за кои не се преговара. Ние не бараме привилегии, туку доследна примена на европското право и почитување на историскиот и културниот идентитет на народите и дигнитетот и интегритетот на индивидуите“, изјави Сиљановска-Давкова.
Македонската претседателка додаде дека интеграцијата на Западниот Балкан не е само политичко, туку и безбедносно прашање, дополнувајќи дека не е доволна само реторика за да се биде отпорен на туѓи влијанија.
„Балканот секогаш бил своевиден лакмус за одмерување на силите на важните актери. Ние имаме 100% усогласена надворешна и безбедносна политика со ЕУ, и заслужуваме низ призма на Копенхашките критериуми да покажеме зрелост и заинтересираност за европском пат“, потенцираше Сиљановска-Давкова.
На крајот од своето обраќање, таа изрази благодарност до Словенија за постојаната поддршка, за разбирањето и за пријателскиот однос, со уверување дека оваа средба ќе биде поттик за уште поблиска и посестрана соработка меѓу двете држави.