По повод Меѓународниот ден на Ромите, претседателката Гордана Сиљановска-Давкова прими истакнати ромски уметници и културни дејци, активни на македонската културно-уметничка сцена и пошироко.
Низ отворен и конструктивен дијалог, беа разменети мислења за македонскиот културен амбиент и местото на уметниците, вклучувајќи ги и ромските во него. По плодната дискусија, се сложија околу насушната потреба да добијат шанса за поголеми можности за присуство и видливост во уметничкиот живот.
Сиљановска-Давкова истакна дека ромските уметници и покрај докажаниот придонес во развојот на македонската културно-уметничка сцена, но и пошироко и подалеку, остануваат маргинализирани.
За неа е важно да се надмине нееднаквоста на шансите во културниот натпревар, преку уметничка, наместо политичка евалуација, како и со поголема институционална поддршка на најталентираните Роми уметници.
Мора да ги надминеме стереотипите и да ги афирмираме очигледните културни ромски дострели.
Уметниците, со претседателката ги споделија своите животни и уметнички визии, искуства, успеси и дострели, препознавајќи во дигиталните платформи и мултимедијалните форми алатки за поголема уметничка презентација.
Беше истакната важноста на вмрежувањето, како фактор за унапредување и стимулирање на нивната уметничка дејност.
Претседателката, честитајќи им го Меѓународниот ден на Ромите, повика на важноста од препознавање и поддршка на најталентираните Роми уметници, како и на младите уметници воопшто, како незаменливи творци на квалитетен културен живот.