Претседателката на Република Македонија, Гордана Силјановска Давкова, вечерва присуствуваше на свечениот прием во Британската амбасада во Скопје, организиран по повод роденденот на британскиот монарх, Кралот Чарлс Трети.
Силјановска Давкова ја искористи можноста да ја потенцира клучната улога на Лондон како еден од најголемите поддржувачи на македонските евроатлантски процеси.
„Ми беше чест да присуствувам на приемот организиран од Британската амбасада во Скопје по повод роденденот на Неговото Величество, Кралот Чарлс III. Обединетото Кралство е наш стратешки партнер и евроатлантски сојузник, којшто континуирано нè поддржува во демократските и економски реформи.“
Претседателката на државата изрази јасен оптимизам дека билатералната соработка меѓу двете земји во иднина дополнително ќе се продлабочува на сите полиња.
„Уверена сум дека ќе продолжиме да развиваме плодни билатерални односи, засновани на меѓусебна почит, доверба и заедничка посветеност кон мирот, стабилноста и просперитетот.“