Македонската претседателка Гордана Сиљановска-Давкова денеска ќе учествува на „Лидерскиот панел“ во рамки на Дипломатскиот форум во Анталија. Овогодинешниот форум, кој се одржува под мотото „Мапирање на иднината, управување со неизвесностите“, собира политички лидери од целиот свет.
Како што информираат од нејзиниот кабинет, модератор на овој значаен панел ќе биде Мевлут Чавушоглу, поранешен шеф на турската дипломатија.
Покрај македонската претседателка, на панелот ќе говорат и високи претставници од неколку држави: претседателот на Казахстан, Касим – Жомарт Токаев, премиерот на Пакистан, Мухамад Шехбаз Шариф, премиерот на Катар, шеикот Мохамед бин Абдулрахман Ал Тани, како и грузискиот премиер Иракли Кобахиѕе.
Оваа активност на претседателката следува по вчерашната билатерална средба во Истанбул со турскиот претседател Реџеп Таип Ердоган. На средбата беше истакнато дека односите меѓу двете земји се темелат на силно пријателство и меѓусебна доверба.
„Констатирано е дека македонско-турските односи се одликуваат со силно пријателство, доверба и континуирана меѓусебна поддршка“, се наведува во соопштението од кабинетот.
Дипломатскиот форум во Анталија оваа година бележи рекорден интерес со учесници од 155 земји, вклучително и 21 шеф на држава и десетици министри.