Силен земјотрес со јачина од 6,9 степени денеска е регистриран во морето кај централниот дел на Филипинските Острови, соопшти Американскиот геолошки завод (USGS), кој ја намали почетната проценка на јачината што првично беше 7,0.
Филипинскиот сеизмолошки завод предупреди на можно „помало покачување на нивото на морето“ и ги повика жителите на централните острови Лејте, Себу и Билиран да останат подалеку од крајбрежјето.
Епицентарот на земјотресот бил на 11 километри источно-југоисточно од Калапе, општина во покраината Бохол со околу 33.000 жители.
Пацифичкиот центар за предупредување соопшти дека „нема опасност од цунами“.
Филипините често се соочуваат со сеизмичка активност бидејќи се наоѓаат на пацифичкиот вулкански „Огнен прстен“. Поголемиот дел од потресите се премногу слаби за да бидат почувствувани, но повремено има силни и разорни земјотреси.
Земјотресите со јачина од 6,0 до 6,9 степени се сметаат за силни. Тие можат да предизвикаат оштетувања и на добро изградени објекти, при што конструкциите отпорни на земјотреси обично трпат мали до умерени оштетувања, додека послабите градби имаат умерени до тешки оштетувања. Земјотресите од оваа јачина можат да се почувствуваат и на стотици километри од епицентарот, а годишно во светот се случуваат меѓу 100 и 150 вакви потреси.