Грчкиот остров Крит рано изутринава беше погоден од силен земјотрес со јачина од 5,8 степени според Рихтеровата скала, предизвикувајќи вознемиреност кај населението. Потресот се случи околу 6:20 часот, а според податоците на Европско-медитеранскиот сеизмолошки центар, епицентарот бил на длабочина од околу 10 километри.
Првиот човек на Организацијата за планирање и заштита од земјотреси, Ефтимиос Лекас, во изјава за грчката телевизија ЕРТ потврди дека земјотресот бил почувствуван многу пошироко од Крит.
„Потресот не се ограничил само на Крит, туку бил почувствуван и на околните острови, вклучувајќи ги Касос и Карпатос. Во моментот сè уште се обработуваат податоците за целосната слика од настанот“, посочи Лекас.
Заменик-гувернерот на регионот Ласити, Јанис Андроулакис, изјави дека земјотресот траел подолго од вообичаено и бил особено изразен во источниот дел на островот, на потегот од Ситија до Хераклион. Поради ова, службите за цивилна заштита веднаш се ставени во состојба на зголемена готовност.
Засега нема информации за регистрирани материјални штети, но жителите се вознемирени поради серијата на последователни, послаби потреси што следеа по главниот удар. Очевидци раскажуваат дека земјотресот бил доволно силен да ги разбуди граѓаните, при што дел од мебелот во домовите бил поместен.