Силен бран на невреме следен со поројни дождови, крупен град, разорни налети на ветер и ризик од поплави се движи низ делови од Европа, а во следните часови ќе ги зафати Словенија и Хрватска.
Според најновата прогноза на Severe Weather Europe, станува збор за дводневен период на изразено нестабилно време кој започнува денеска над западниот и северниот Медитеран и постепено се движи кон Јадранот и Балканот.
Најпрво на удар се Балеарските Острови, јужна Франција, Корзика, Сардинија и северна Италија. За делови од овие региони е издадено високо ниво на опасност поради можност од екстремно силни грмежи, крупен град, ветер со разорна сила, поројни дождови, бујични поплави, а локално не е исклучена ниту појава на торнадо.
Според метеоролошките проценки, ветерот во најсилните невремиња би можел да достигне околу 120 километри на час, а локално се можни и огромни количества дожд.
Во текот на вечерта и ноќта невремето постепено ќе се движи кон северна Италија, западна Словенија и северозападна Хрватска, кои во четврток ќе бидат меѓу најризичните подрачја. За овие региони е издадено високо ниво на опасност поради можни силни грмежи, многу крупен град, разорни налети на ветер, обилни врнежи и локални бујични поплави.
Зголемен ризик е најавен и за јужните делови на Хрватска, Јадранското Море и западна Босна и Херцеговина, каде исто така се можни силни грмежи, град и обилни врнежи. Хрватскиот Државен хидрометеоролошки завод веќе издаде предупредувања за четврток, со можност локално да наврнат повеќе од 50 литри дожд на квадратен метар.
Причина за ваквата нестабилност е комбинацијата од топлото Средоземно Море, големо количество влага и силни воздушни струења во повисоките слоеви на атмосферата, кои предизвикуваат создавање на моќни грмежни облаци. На одредени подрачја во северна Италија, Словенија и Јадранот во период од 36 часа би можеле да наврнат и 200 до 300 литри дожд на квадратен метар, што го зголемува ризикот од бујични поплави.
Нестабилното време ќе продолжи и во четврток, а дел од грмежните системи може да се задржат и во текот на петок.