Вкупно 140 официјални пријави за заразна болест се веќе пристигнати до епидемиолошката служба на Институтот за јавно здравје. Иако бројката на граѓани со симптоми на терен е многу поголема, од ИЈЗ појаснуваат дека постои точна законска дефиниција и процедура според која локалниот Центар за јавно здравје мора да ја формализира одлуката за прогласување епидемија.
Д-р Драган Кочински во детали ги образложи законските предуслови кои мора да бидат исполнети:
„Согласно законската дефиниција, за да се пријави епидемија потребно е да има необично зголемување на бројот на случаи во споредба со истиот период од претходните години, но и да има пристигнато официјални пријави за заразна болест до епидемиолошката служба. До овој период, како што кажав, имаме 140 официјални пријави. Колешката од Гостивар ја следи ситуацијата во континуитет и штом се исполнети двата клучни услови за прогласување, соодветно ќе реагира.“