Шпанската полиција, во соработка со косовските безбедносни сили, успешно го лоцираше шестгодишното девојче кое пред две недели беше киднапирано од нејзиниот татко на Мајорка, објави шпански „Ел Мундо“.
Меѓународната операција наречена „Мост“ заврши со апсење на таткото на територијата на Косово, по што малолетничката во добра здравствена состојба веќе е вратена кај нејзината мајка на Мајорка.
Истрагата на Цивилната гарда покажала дека бегството било однапред детално планирано, при што таткото го скрил детето во багажник на автомобил за да се качи на траект и да ги помине граничните контроли.
За да ја пренасочи истрагата кон лажна локација, осомничениот го ставил уредот AirTag од ранецот на девојчето во поштенска пратка насочена кон Мароко, но полицијата брзо го открила маневарот преку претреси, прегледи на камери и банкарски трансакции.
Откако беше издадена европска потерница, шпанската полиција го реконструираше неговиот пат низ неколку европски земји, а германските служби открија и возило со фалсификувани таблички кое било користено во бегството.
Осомничениот ги затворил своите банкарски сметки, ги избришал социјалните мрежи и го променил личниот опис, но координираната акција со косовската полиција резултираше со негово апсење на 24 јуни.
Цивилната гарда упати благодарност до сите инволвирани меѓународни служби, додавајќи:
„Цивилната гарда ја истакна брзината на судските постапки, меѓународната соработка и заедничката работа на единиците учеснички, што овозможи решавање на „особено чувствителна“ истрага за само неколку дена и ја гарантираше заштитата на малолетникот.“